D&G港女Facebook慘遭起底 面書五式幫你保安全！

香港起底事件今日又來一次，本來好地地一次D&G影相行動以香港人性格，真係做過一次就好快唔記得，然後大家就街照行，鋪照開。點知一個港女Sales同班朋友係Facebook衰多口，家陣唔單止自己底已起，重要連老公同朋友都被人起晒底，就係衰係唔記得幫佢個Facebook設定私隱。結果起底組一出，成班朋友同佢就咁燒焦。有見及此胡說決定教下大家點樣係Facebook保護自己之法，等大家講野都可以講得放心，Post相都可以post得盡情。

Step 1：
首先係頂頭主頁Tab位點擊，之後就選擇私隱設定。

Step 2：
跟著就係設定個欄選擇「朋友」，咁樣就已經可以將部發文同更新對非友人封鎖起來，但假如係朋友個朋友的話都重可以睇到。

Step 3：
之後再係「人際關係鏈」上將所有設定改成朋友，唯獨係「交友邀請」選項可以改為「朋友的朋友」，咁樣所有資料都只限朋友先見到，但其他人又唔可以睇到你朋友留言去，從另一個方式去起你底。（當然都會有風險，就係有人想亂ADD黎食花生）

Step 4：
而係設定私隱前更新都會依用家自己設定，所以都係會有機會被人睇得返。不過大家都可以去「限制舊帖的分享對象」，將舊文全部設定為做「只限朋友」，咁樣就無人可以從舊文中起到你底。

Step 5：

當然…你自己保安做到足，但係Facebook重有一個煩膠設計可以俾人起到你底：打卡！因為你朋友可以係打卡個陣Tag埋你名落去，變相話晒俾人知你同佢去過邊。不過呢個就可以係「如何標註人名」中，將「朋友可以幫你簽到」選擇關閉，咁就萬無一失…不過最後一招，大家只要學到就一定無問題。

Step 6：

就係出少句聲無人話你啞架死蠢，話人地腦殘都算啦，重要爆埋自己係D&G員工，呢個風頭火勢重出黎咁講野真係醒目極有限，可能佢真係未聽過咩叫「淆底可保一世平安」。一段笑談旺角話講晒佢依家個情況…